問:「拍一分鐘嘅片，收幾錢？」
尋日同大家提及過，客戶經常會問製作人「拍一分鐘嘅片，收幾錢？」
作為製作人，我地真係好怕遇到呢d問題，咁你又可以問:「究竟呢個問題有咩問題呢？」
冇錯，問問題係冇問題，但係問問題嘅前題，就係要對行業嘅尊重，唔好用你先入為主嘅想法去「壓」人。
例如，作為客戶的你，唔識野真係唔緊要，但係你要問問題時，唔該你地虛心d，唔好一副「我地係俾錢你拍野，我叫你就做啦」嘅態度。你要搞清楚嘅係: 你有俾錢，我付出專業，大家都係對等的，冇話邊個大過邊個。要達成件事，做成一單job，就要大家「有商有量」，而唔係「有錢大晒」。
咁究竟「拍一分鐘嘅片，收幾錢？」呢條問題有乜野問題呢？我可以答你，條問題本身係冇乜問題，但係問問題果個後續對答同態度先至係關鍵。因為當你問完「拍一分鐘嘅片，收幾錢？」嘅時候，如果被問的專業製作人接到呢條咁簡單嘅問題，而個製作人又肯答你的話，咁呢條問題真係冇問題。但係如果你問完呢句「拍一分鐘嘅片，收幾錢？」之後，我可以好肯定咁話你聽，真正嘅製作人憑呢條問題，係唔會答到你幾錢的。
你只係投資者，你想俾錢人幫你拍條片，呢個好理解，你唔識行業規矩，呢個都好理解，但係你唔尊重行業，呢個就係會令人費解。點解話你唔尊重行業呢？因為當初你自己都冇諗清楚自己想請人拍一條乜野片，諗得太過空泛，最實際嘅就係時間———一分鐘，其他資訊乜野都冇，亦唔諗住咁快有，只係想知個budget就乜叉都唔理，呢個態度就等於入到去茶餐廳，然後大叫「我好肚餓，請問食餐飯要幾錢架？」然後個侍應一定會問你:「你想食乜野先？我地呢度有粉麵飯，樣樣唔同價錢，你想要邊樣？」呢種情況就相當於你問「拍一分鐘嘅片，收幾錢？」呢句之後嘅後續對答，個製作人一定會問返你:「你想拍乜野先？拍唔同嘅野就收唔同價錢」。
拿，如果你喺茶餐廳，你都仲可以答佢你會食乜野，諗多幾分鐘就得，反正餐牌有晒價錢。但係如果係quote價問人拍片幾錢，而個製作人又問返你拍乜野時，通常，我指通常，我地行家會得到呢個令我地更憤怒的回答:「我地未知拍乜野架，內容未諗，我地只係想知幾多錢，計好budget之後，再決定拍唔拍」，呢個回答，相信行業內很多人都聽過，我地點解聽到呢個回答會咁憤怒呢？就係因為「製作」呢回事並唔係茶餐廳，並唔係麥記，你作為客戶，只係得「一分鐘」呢個實在資訊，連諗都未諗，剩係睇價錢，我知道做生意睇錢係好正常，但係有d野係講合作上的誠意及態度，如果你真係眼中只得部計數機而一丁點都冇諗過想拍乜野，咁我地真係會好失望，因為你只係當我地麥記，做乜都係段鐘計。唔好話你唔識，你平時有睇電視睇廣告睇youtube片之類，都有睇到好多唔同片種，用common sense黎諗，你唔係真係覺得每單job都係段小時計下話？你稍為問問身邊朋友，或者朋友嘅朋友，梗有一個製作人在左近，都知道一條影片，除左渣機拍攝之外，仲要有埋收音，打燈，導演，剪接，道具，化妝等等，樣樣都係錢，但係偏偏你就「橋」埋雙手然後就大大聲同我講:「拍一分鐘嘅片，收幾錢？」肯答你果位行家真係傻左囉。
好喇，當你有一日真係問到有條友肯答你「拍一分鐘嘅片，收幾錢？」呢條問題，例如佢會答你:「拍一分鐘嘅片，收費一萬」，之後你發現原來唔夠budget，你公司只係預左俾$5000出黎for拍片，點解你唔早講？同埋，當有人答你一萬時，你還價話可唔可以$5000，果下對答好有機會係咁:
「拍一分鐘嘅片，收幾錢？」（冇其他資訊）
「一萬」
「一萬...O左我地個budget呀，老細冇預咁多架...」
「咁你搵其他人吧」
「可唔可以，唔拍一分鐘咁長，我地只能出$5000，你幫我地拍30秒丫？」
「......」
留意，個客，即係你，都係覺得deliverable條片嘅最終長度，先係收費嘅標準。呢個觀念真係超錯！因為推算之下，條片一分鐘要一萬，個客得$5000就只拍30秒，咁假設個客只係要1秒嘅片，咁個收費會唔會係$5000/30=$166.66? 梗係唔係啦！你試下在茶餐廳，你又同個老細咁樣對答:
「食餐飯，收幾錢？」
「粉麵飯乜都有，你食乜？」
「咖喱牛腩飯，唔該」
「$40」
「呀，我冇錢，我只預左$2 budget在食飯呢件事上，我可唔可以照比例食，你只需俾1/20碟飯俾我，即係大概60粒米我？」
「......」
咁樣講野法，又係一句激嬲左人囉，明唔明？
我唔係想鬧人，我真心想教育你班客，其實你地俾錢之餘，真係有責任知多d架.1
拍一分鐘嘅片，點解答你唔到？你自己上youtube睇下，好多一分鐘嘅片，答案自然會出左黎。除左識俾錢之外，出黎合作係要講尊重同態度，自己搵人之前都要有責任去諗清楚，了解清楚件事，先再去問人幾錢啦好冇？
一分鐘嘅片有貴有平，由$0至$1000000000不等，以下呢條片又係一分鐘，同樣係一分鐘嘅片，但隨時係天價。呢條片係我朋友send俾我，你又嘗試估下佢地用左幾多時間拍、剪，同埋收幾錢？唔識可以多觀察多學習，俾錢唔係大晒的，共勉之。
https://www.facebook.com/jetsoiphone/videos/1807023669318826/
拍這段廣告到底要 NG 多少次？！
#日本廣告
Search